د پاکستان د شخړو او امنیتي مطالعاتو انسټېټیوټ (PICSS) وايي، تېره مارچ میاشت په دغه هېواد کې ترسره شوي بریدونه له ۲۰۱۴ کلونو راپدېخوا تر ټولو زیات و.

د دغه انسټېټیوټ د معلوماتو له مخې، تېره میاشت پاکستان کې ۱۰۵ د امنیت ضد پېښې شوې دي چې له امله یې د سلګونو کسانو مړینه پکې ثبت شوې، چې له ډلې یې ۷۳ تنه یې امنیتي ځواکونه دي.

ډان معتبرې پاکستاني ورځپاڼې راپور کې ویلي، د تېرې میاشتې په بریدونو کې ۲۵۸ تنه ټپیان شوي، چې له ډلې یې ۱۲۹ تنه امنیتي ځواکونه دي.

راپور کې راغلي، د پاکستان نورو ایالتونو سربېره تېره میاشت پنجاب ایالت کې سخت وسلوال بریدونه ترسره شوي دي.

بلخوا په هغه هېواد کې خپلواکې رسنۍ د تېرې میاشتې په امنیتي پېښو کې پوځ ته اوښتې مرګژوبله لوړه ښيي.

پاکستاني شنونکي په هغه هېواد کې د ترینګلی امنیتي وضعیت پړه د پاکستاني حکومت ناسم سیاست بولي.